គុណសម្បត្តិ​និង​ គុណ​វិបត្តិរបស់ iCloud លើ​ iPhone ដែលអ្នក​ត្រូវ​ដឹង​​ឲ្យ​ច្បាស់ មុន​សម្រេច​ចិត្ត​ប្រើប្រាស់

បច្ចុប្បន្ន​បណ្ដា​យុវវ័យ​ជា​ច្រើន អាច​កំពុង​ស្ទាក់​ស្ទើរ​ចិត្ត​ថា​គួរ​ប្រើប្រាស់​ប្រព័ន្ធ iCloud នៅ​លើ​ទូរសព្ទ​របស់​ខ្លួន​ឫ​ក៏​អត់។ ថ្ងៃ​នេះ Biz Tech Tip Talk សូម​លើក​យក​អំពី​ចំណុច​នៃ​អត្ថប្រយោជន៍​និង​គុណ​វិបត្តិ​ចំនួន ៥ ធំៗ​ដែល​អ្នក​ប្រើប្រាស់​គួរ​ស្វែងយល់​ឱ្យ​បាន​ច្បាស់​ ជុំវិញ​ការ​ប្រើប្រាស់​ iCloud

គុណសម្បត្តិ៖ 

១. សាមញ្ញ​ងាយ​ស្រួល​ប្រើ៖ ដំណើរ​ការ​នៃ​ប្រព័ន្ធ iCloud គឺ​ងាយ​បំផុត តួយ៉ាង​ដូច​ជា​ការ​រក្សា​ទុក (Back up) ឯកសារ​ ដោយ​អ្នក​គ្រាន់​តែ​ចុច​តាម​វា​ ប៉ុន្មាន​ជំហាន​គឺ​​ជា​ការ​ស្រេច​

២. មិន​តម្រូវ​ឲ្យ​មាន​កុំព្យូទ័រ​និង​ខ្សែ​ត​ភ្ជាប់៖ សម្រាប់​ចំណុច​នេះ ការ​ប្រើប្រាស់ iCloud យើង​ក៏​អាច​បញ្ជា​តាម​រយៈ​ iPhone ផ្ទាល់​ ដោយ​ពុំ​បាច់​មាន​ឧបករណ៍​ជំនួយ​ដទៃ​ឡើយ​

៣. Free អង្គ​ផ្ទុក​ទិន្នន័យ 5GB ឥត​គិត​ថ្លៃ៖ បើ​អ្នក​សម្រេច​ចិត្ត​ធ្វើ​ការ Back up ឯកសារ​ទៅ​ក្នុង​ប្រព័ន្ធ iCloud នោះ​អ្នក​នឹង​ទទួល​បាន​អង្គ​ផ្ទុក​ទិន្នន័យ ៥GB ដោយ​ឥត​គិត​ថ្លៃ​

៤. ងាយ​ស្រួល​ផ្ទេរ​ទិន្នន័យ​ត្រលប់​មក​វិញ៖ មិន​ខុស​ពី​ចំណុច​ទី ១ ដោយ​ទោះ​បី​ជា​អ្នក​ចង់​ផ្ទុក​ឯកសារ​ត្រលប់​មក​ទូរស័ព្ទ​វិញ (Restore) អ្នក​ប្រើ​ល្មមៗ អាច​ចុច​បាន ព្រោះ​វា​ងាយ​បំផុត 

៥. ប្រើ​ iCloud ដោយ​ពុំ​បាច់​ចំណាយ​លុយ៖ គ្រប់​មុខងារ​ទាំង​អស់ គឺ​បើក​ឲ្យ​ប្រើប្រាស់​ដោយ​សេរី ពុំ​មាន​តម្រូវ​ចំណាយ​លុយ​អ្វី​បន្ថែម​ឡើយ​ ដែល​កត្តា​នេះ​ហើយ ធ្វើ​ឱ្យ​មនុស្ស​ជា​ច្រើន​ចូល​ចិត្ត​ប្រើប្រាស់​វា 

គុណ​វិបត្តិ៖ 

១. តម្រូវ​ឱ្យ​ប្រើប្រាស់​ប្រព័ន្ធ​អ៊ីនធឺណិត៖ រាល់​ពេល​ដែល​អ្នក​ចង់​ធ្វើ​ការ​ Back Up រាល់​ឯកសារ​ពី iPhone ចូល​ iCloud គឺ​តម្រូវ​ឱ្យ​អ្នក​ត​ភ្ជាប់​ទៅ​ប្រព័ន្ធ Wi-Fi ជា​មុន​សិន 

២.​ បញ្ហា​សុវត្ថិភាព៖ នេះ​ជា​បញ្ហា​ធំ​បំផុត ករណី​បើ​អ្នក​ចែក​រំលែក​គណនី​ទៅ​កាន់​អ្នក​ប្រើប្រាស់​ដទៃ​ នោះ​ពួក​គេ នឹង​អាច​ឆែក​មើល​រាល់​ឯកសារ​សម្ងាត់​ទាំង​អស់​បាន

៣. ល្បឿន​ផ្ទេរ​ទិន្នន័យ​យឺត: អ្នក​ប្រើប្រាស់​ជា​ច្រើន​ បាន​កត់​សម្គាល់​ឃើញ​ថា ករណី​បើ​យើង​ផ្ទេរ​ឯកសារ​កាន់​តែ​ធំ នោះ​ល្បឿន​ផ្ទេរ​ទិន្នន័យ​ទៅ​ក្នុង​ iCloud ពិត​ជា​យឺត​មែន​ទែន 

៤. អង្គ​ផ្ទុក​ទិន្នន័យ​ ៥GB: សម្រាប់​អង្គ​ផ្ទុក​ទិន្នន័យ​ប៉ុន​នេះ អ្នក​ប្រើប្រាស់​មួយ​ចំនួន​អាច​សម្រប​បាន​តែ​ដំបូង​ប៉ុណ្ណោះ ក្រោយ​ៗ​មក​ទៀត បើ​អ្នក​ចង់​បន្ថែម​អង្គ​ផ្ទុក​ទិន្នន័យ​ក្នុង​ប្រព័ន្ធ iCloud ឲ្យ​បាន​ច្រើន វា​តម្រូវ​ឱ្យ​អ្នក​ ធ្វើ​ការ​ចំណាយ​លុយ 

៥. មិន​គាំទ្រ​ការ​ Back Up គ្រប់​ឯកសារ​ទាំង​អស់៖ ទាក់​ទង​ដូច​ជា​ឯកសារ​វីដេអូ ចម្រៀង​ជា​ដើម បើ​មិន​បាន​ទិញ​ពី iTunes Store ទេ គឺ​វា​មិន​អនុញ្ញាត​ឱ្យ Back Up បាន​នោះ​ឡើយ

ដកស្រង់ពី អត្ថបទ Sabay News